ابتسم!!فـ غيرك يكد كد ...!!!

miss.tootaa الخميس نوفمبر 06, 2008 9:12 am

قـم الله يأخذك ود اخوانك للمدارس يالله قم جعلك للمرض قم لأتوطى في كرشتك اللي جايه على شكل مثلث الوالد يصب غضبه الشديد في الساعات الأولى من اليوم الجديد .. وانا بأعصاب بارده اتحامل نفسي ولو أنه مو الوالد كان عطيته مخمس ينسيه المدارس وأذهب متجهاً نحو دورة المياه وبعد الغسيل والأستعداد للفطور واذا بالجزء الثاني من الغضب ينصب علي من جديد كما تصب قوطي العسل أبو ريال في الصحون .. وأبدأ بالآكل وانا مضغوط من الداخل كأني بنقالي حاشرينه شلة مبزره في زاويه وبعد قليل نهضت ولم أغسل يداي لأني كنت في وضعاً لأأحسد عليه

وركبت السياره بأنتظار خروج الأخوان من البيت .. وبينما انا انتظر بالسياره أشغلت المسجل واذابهِ يصُدر ضجيجاً وكأنه مكيف مركبين له ماطور ثلاجه بالغلط . وأقفلته واذا بالأخوان طلاب العلم يخرجون من المنزل ويركبون السياره واحرك للمدرسه وعند وقوفي عند آخر أشاره شدني ريحة تصدرُ من السياره الواقفه بجانبي .. والتفت واذا بي ارى تلك العبـده . من أول وهله تخيلت انها أستبنه !! بس غريبه استبنه راكبه قدام . وأخذت توزع الأبتسامات على هذا الصباح الكئيب < برؤيتهـا وانزل الأخوان في المدرسه وأذهب للبيت وانا أفكر في طريقة سهله للأنتحار .. وبشرط تكون حلوه عشان اذا سألني واحد كيف وافتك المنيه أخبره الطريقه ..

ودخلت المنزل .. واذا بالوالد مضطجع على جنبه وكأنه ضب واقف على جحره بعد ماسحب بـ 21 قروي وقاعد يبتسم وبصوتً غليطً قال : وديت أخوانك !!؟ .. قلت له وانا مجمع قهر الدنيا في خشمي وكل لكاعة الدنيا في لساني : لا رحنا محل تصوير عشان نصور سوا .. اييييه وديتهم .. واذا بهِ يتقهقه .. تقهقهق على رأسك بريق السيف أصلي عشان تعرف أن الله حق .. وانا ادخل لـ أكمال نومي وبعد ساعتين واذا بالخادمه تطرق باب الغرفه . وتقول : دودو هادا بابا كلام ودي هوا بنك راجهي .. فـ قلت في قلبي : الله يعين موظفين بنك الراجهي على كفيلتس .. وأتحامل نفسي واركب السياره واذا به يخرج من البيت ويرى جارنا أبو شكيب .. وذهب للسلام عليه وانا كأني سواق بنقالي ينتظر كفيلته " مديرة المدرسه " تطلع عشان يوديها .. وبعد أنتظار نصف ساعه واذا بهِ يركب السياره فـ قلت له بـ صوتاً غاضب : الا تعلم أنني انتظرك هنا منذ ساعه !!!!!؟ .. فـ قال : سق وانت ساكت وخل عنك اللغه العربيه لأتوطى في حوض بطنك .. فـ قلت : حسناً حسناً سـ أسوق وسـ أحاول جاهداً الدخول في ماصوره عشان نسوي كريسمس اليوم بـ فقدان واحد فينا .. ويرقعنـي مخمس واذا بالهـدوءً يسود غمرة القيـاده

وبعـد ربـع ساعه من المخمس واذا بي امام بنك الراجهي .. عفواً الراجحي .. فـ قلت له : اذهب وسأنتظرك ريثما تعود .. فـ قال : ترى برقعك بـ كلمه ريثما الي كاتبها .. أمش أنزل معي .. وانزل وانا كأني مملوك أثيوبي أيام الجاهليه شاريه واحد قعيطي يسحبه من مكان لـ مكان .وادخل البنك واذا بـ موظف تبدو على وجهه علامات الغضب والشر وبعد أنتظار ربع ساعه زحلقـوا الوالد على ذالك الموظف.. وانا واقف خلف الوالد تماماً واذا بالموظف يقول : عطني أوراقك اللي طالع لونها أصفر من كثر ماخيست بدرج السياره اللي يشوفهـا يقول مخالفة مرور ماهي أوراق بنك ..وانا أضحك واقول للوالد حتى الموظف نتفك بـ ذبه آليمه .. واذا بالوالد يلتفت على الموظف ويقول : لاترفع صوتك لأسطرك بـ هاللي واقف وراي !!؟ واذا بي أعزز ذبة الوالد فـ قلت : انت المفروض يوظفونك مساعد طقاقه ولا الكرسي والطاوله شيء كبير عليك واذا بـ ضحكه الوالد تملؤ جنبات البنك .. وهو يردد : كفو كفو يادراغون انا أشهد أني جبت ورع رجال !!

واثناء الضحك واذا بـ مدير البنك يقف امامنا ويقول : وش هالزحمه اللي مسوينها ؟ والوالد يناظر فيني ويقول : رد عليه وش ذا الزحمه اللي مسويها أنت فـ قلت له وانا كلي حقد على أبوي اللي جحدني وحط المشكلهـ برأسي : أبد الوالد يبي يحول كل اللي في رصيـده لـ الجمعيه الخيريه للمعاقين . قال المدير بفرحه وكأنه جايه مولود 2 في 1.. خلاص تعال معي وابشر انا احول لك كل المبلغ ترى نساعد اللي يحب الأعمال الخيرية<<افلقني
.. وانا اناظر في وجه أبوي متلون طلع كأنه مطبق موز مع فراوله .. قلت له شد حيلك وانت راجع للبيت ترى بتجي كعابي واغادر البنك متجهاً للسياره وانا به خلفي يركض يقول شغل شغل المدير ،،، دخل وطلعت مادرى عني .. وركبنا المكنسه اللي جايين عليها للبنك وتوجهاً للبيـت .

وعند دخولي البيت واذا بالخدامه ترافس في المطبخ .. واجيها وأقول : وش فيك يا [ صيينيه ] .. قالت : صينيه توقع برأسك أسمي صفيه يالوح .. واستطردت قائله : بطني فيه تسونامي أبي اروح المستشفى .. وأروح لـ مدير بيتنـا .. قلت له : خدامتكم تبي المستشفى في بطنهـا تسونامي يمكن يتطور ويصير أعصار قونا اللي ضرب ولايه فلاديفيا عام 1888 ميلادي .. واذا بالوالد شاطفني وكأني شحاذه واقفه عند أشارة تطر .. وارفع صوتي قلت في بيتا تسونامي يايبـه .. ويرصني بالريمـوت .. قال بلغ عنها هيئـة الأرصاد يجون يشيلونك ويشيلونها .. فـ مع تأؤهات الخدامه وازعاج قناة الجزيره أصبت بـ قرحه في رأسي و المخيخ بدأ يطوف .. فـ ركضت للحمام .. آآآ ..{ عفواً }ركضت للمطبخ واخمهـا والقط البشت بحركه بهلوانيه واحذفهـا في المرتبـه اللي ورى .. وادعس بهـا للمستشفى واثناء وصولي للمستشفى الا هي مغمى عليها ( والله النكبه ) .. وادخلها على الدكتور قال وش فيها ؟ قلت مأدري فيها تسونامي .. هو دايم يجيها تسونامي الا هالمره الظاهر أنه تسونامي قوي .. ويناظر فيني احس أنه يقول بـ قلبه وش جاب ادلخ واحد بالسعوديه هنا !! .. وقال : مافيه شيء أسمه تسونامي .. وقال : أنت مفهي خلك برى وانا بشوف وش فيها ! ( يلعن شكلك أنت وصلعتك انا مفهي؟) .. واطلـع وانا متحطم من الداخل والخارج وبالأطراف .. واثناء الأنتظـار واذا بـ ممرضه سعوديه طلقـه شاطفتني .. وتناظر فيني واناظر فيها قلت : ياليتني عامل نظافه في مستشفى فيه أنتي ياعسل < يسمع بالغزل .. واذا بـ كلمه أنقليزيه تنطلق من فمها وكأنها رصاصة ساكتـون قالت : شآآآآرب .. [ يعني انطم يادراغون] .. فـ انتظرت حتى خرجت [ صفيه ] من الغرفـه ..

وأقلعـت فيهـا مسرعاً للبيـت حتى أني لم أذكر أني واجهـت أشارة مرور في طريق عودتي مع العلم أن اشارات المرور كانت 8 أشـارات ولكن لا أعلم أين اختـفت أثنـاء العـوده [ يمكن لأني سادح الطبلـون ] وتمـر الأيـام والسنيـن وانـا أمـارس أشـد العـذاب والكـرف في منـزلنـا ولكـني لازلت حتـى كتـابتي لهـذا المـوضـوع ![ صابراً محتسباً للآجر ]! ..

إبتسم انت ووجهك ترا فـ غيرك يكد كـد .. !!!